ஈஸ்டர் ஞாயிறு பயங்கரவாதத் தாக்குதல்கள் தொடர்பான விசாரணைகளில் தனது கைது நடவடிக்கையைத் தடுக்கும்படி கோரி முன்னாள் ஜனாதிபதி கோட்டாபய ராஜபக்க்ஷ தாக்கல் செய்த மனு தொடர்பாக பிரதிவாதிகளிடமிருந்து தனக்கு இன்னும் அறிவுறுத்தல்கள் எதுவும் வரவில்லை என்று சட்டமா அதிபர் இன்று (17) மேல்முறையீட்டு நீதிமன்றத்தில் தெரிவித்தார்.

மேல்முறையீட்டு நீதிமன்றத்தின் தலைவரும் நீதிபதியுமான ரோகந்த அபேசூரிய மற்றும் பிரியந்த பெர்னாண்டோ ஆகியோர் அடங்கிய மேல்முறையீட்டு நீதிமன்ற நீதிபதிகள் அமர்வின் முன்பாக, இந்த மனு இன்று விசாரணைக்கு எடுத்துக்கொள்ளப்பட்டது.

அப்போது, ​ நீதிபதி பிரியந்த பெர்னாண்டோ, தனிப்பட்ட காரணங்களால் இந்த விசாரணையில் பங்கேற்கப் போவதில்லை என்று தெரிவித்தார்.

மனுதாரர் கோட்டாபய ராஜபக்ஷவுக்காக ஆஜரான ஜனாதிபதி சட்டத்தரணி ரொமேஷ் டி சில்வா, தனது கட்சிக்காரரின் கைது நடவடிக்கையைத் தடுக்கும் இடைக்காலத் தடை உத்தரவைப் பிறப்பிக்குமாறு நீதிமன்றத்தைக் கேட்டுக் கொள்வதாக நீதிமன்றத்தில் தெரிவித்தார்.

இருப்பினும், எதிர்மனுதாரர்களுக்காக ஆஜரான பிரதி சொலிசிட்டர் ஜெனரல் சுஹர்ஷி  ஹேரத், இந்த வழக்கு தொடர்பான ஆவணங்களை இன்று காலை பெற்றதாகவும், இன்றுவரை எதிர்மனுதாரர்களிடமிருந்து எந்த அறிவுறுத்தல்களும் வரவில்லை என்றும் தெரிவித்தார்.

எதிர் தரப்பினருடன் கலந்தாலோசிக்காமல், மனுதாரர் கைது செய்யப்பட மாட்டார் என்று நீதிமன்றம் உறுதியளிக்க முடியாது என்றும் பிரதி சொலிசிட்டர் ஜெனரல் தெரிவித்தார்.

இதனையடுத்து நீதிமன்றம் விசாரணையை இன்று பிற்பகல் வரை ஒத்திவைத்தது.