பிரான்ஸ் ஜனாதிபதி இம்மானுவேல் மேக்ரான் (Emmanuel Macron) சிரியாவின் தலைநகர் டமாஸ்கசில் (Damascus) தங்கியிருந்த ஃபோர் சீசன்ஸ் விடுதிக்கு அருகே அடுத்தடுத்து இரண்டு குண்டுகள் வெடித்த சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.

கடந்த 2024-ஆம் ஆண்டு பஷார் அல்-அசாத் பதவியிலிருந்து அகற்றப்பட்டு, புதிய ஜனாதிபதி அகமது அல்-ஷரா (Ahmed al-Shara) தலைமையிலான அரசு அமைந்த பிறகு, சிரியாவிற்குச் சென்ற முதல் ஐரோப்பியத் தலைவர் மேக்ரான் ஆவார். அவர் மாலையில் ஜனாதிபதி மாளிகைக்குப் புறப்பட்ட சிறிது நேரத்திலேயே இந்தச் சம்பவம் நடந்துள்ளது. குப்பைத் தொட்டி ஒன்றிலும், நிறுத்தி வைக்கப்பட்டிருந்த காரிலும் வைக்கப்பட்டிருந்த குண்டுகள் வெடித்ததில் 4 காவல்துறை அதிகாரிகள் உட்பட 18 பேர் காயமடைந்துள்ளனர். அதிர்ஷ்டவசமாக உயிரிழப்புகள் எதுவும் உடனடியாகப் பதிவாகவில்லை.

மேக்ரானைக் குறிவைத்து இந்தத் தாக்குதல் திட்டமிடப்பட்டிருக்கலாம் எனப் பாதுகாப்பு நிபுணர்கள் கருதும் நிலையில், குண்டுவெடிப்புச் சத்தங்களைக் கேட்காத மேக்ரான் பாதுகாப்பாக ஜனாதிபதி மாளிகையைச் சென்றடைந்ததாகப் பிரான்ஸ் அரசு அதிகாரப்பூர்வமாகத் தெரிவித்துள்ளது.

இச்சம்பவம் குறித்துப் பதிவிட்டுள்ள மேக்ரான், “இறையாண்மை கொண்ட, பாதுகாப்பான, ஒன்றுபட்ட சிரியாவில் வாழ வேண்டும் என்ற சிரிய மக்களின் பேராவலை எதனாலும் நசுக்க முடியாது; அங்கு மக்களின் கண்ணியம், துணிவு மற்றும் உறுதிப்பாட்டைக் கண்டேன், எனது பயணம் தொடரும்” என்று உறுதியுடன் தெரிவித்துள்ளார். இதுவரை எந்தவொரு அமைப்பும் இத்தாக்குதலுக்குப் பொறுப்பேற்கவில்லை.