இத்தாலியில் கால்வாயில் மிதந்த நிலையில் இலங்கையர் சடலமாக மீட்பு

இத்தாலியின் மிலன் நகரில் உள்ள கோர்செகோ (Corsico) பகுதியில் அமைந்துள்ள நவிக்லியோ கிராண்டே (Naviglio Grande) கால்வாயில் மிதந்த நிலையில் இலங்கையர் ஒருவரின் சடலம் மீட்கப்பட்ட சம்பவம் அங்குள்ள இலங்கை சமூகத்தினரிடையே அதிர்ச்சியை ஏற்படுத்தியுள்ளது.

உயிரிழந்தவர் 38 வயதான ஷான் ஹேமல் கோமிஸ் முஹந்திரம்கே என அடையாளம் காணப்பட்டுள்ளதாக இத்தாலிய ஊடகங்கள் செய்தி வெளியிட்டுள்ளன.

கடந்த ஜூன் 16 ஆம் திகதி செவ்வாய்க்கிழமை பிற்பகலில், மிலன் மாகாண தீயணைப்புப் படையினர் கால்வாயில் மிதந்த நிலையில் காணப்பட்ட சடலத்தை நீரில் இருந்து மீட்டனர். அதற்கு முன்னர், அப்பகுதியை கடந்து சென்ற சிலர் கால்வாயில் மனித உடல் மிதந்து கொண்டிருப்பதை அவதானித்து அதிகாரிகளுக்கு தகவல் வழங்கியதாக தெரிவிக்கப்படுகிறது.

விசாரணைகளின் படி, உயிரிழந்த இலங்கையர் சம்பவத்திற்கு முந்தைய நாள் வழக்கம்போல் பணிக்குச் சென்றிருந்தார். எனினும், அதன்பிறகு அவரைப் பற்றிய எந்த தகவலும் கிடைக்காததால், அவர் வீடு திரும்பவில்லை எனக் கவலை அடைந்த மனைவி அதே நாளில் காவல்துறையில் காணாமல் போனவர் தொடர்பான முறைப்பாட்டை பதிவு செய்திருந்ததாக தெரியவந்துள்ளது.

பின்னர் மறுநாள், கோர்செகோ பகுதியில் உள்ள ‘மியூசிகா’ மிதிவண்டி மற்றும் பாதசாரிகள் பாலத்திற்கு அருகாமையில் அமைந்துள்ள வியா அல்சாயா ட்ரைஸ்டே (Via Alzaia Trieste) சாலைக்கு அருகில் கால்வாயில் மிதந்த நிலையில் அவரது உடல் கண்டுபிடிக்கப்பட்டது.

சம்பவம் தொடர்பான தகவல் கிடைத்த உடனேயே 118 அவசர மருத்துவ சேவைப் பிரிவினர், உள்ளூர் காவல்துறையினர் மற்றும் கராபினேரி பாதுகாப்புப் படையினர் சம்பவ இடத்திற்கு விரைந்து சென்று விசாரணைகளை ஆரம்பித்தனர்.

ஆரம்பகட்ட விசாரணைகளின் அடிப்படையில், சடலம் கண்டுபிடிக்கப்படுவதற்கு முன்னர் பல மணிநேரங்களாக நீரில் இருந்திருக்கலாம் என அதிகாரிகள் சந்தேகிக்கின்றனர். உடலில் வெளிப்படையான தாக்குதல் அல்லது வன்முறைக்கான அறிகுறிகள் எதுவும் கண்டறியப்படவில்லை என்றாலும், மரணத்திற்கான துல்லியமான காரணம் இதுவரை உறுதிப்படுத்தப்படவில்லை.

இது தற்செயலான விபத்தா, திடீர் உடல்நலக்குறைவு காரணமாக ஏற்பட்டதா, தற்கொலை சம்பவமா அல்லது வேறு ஏதேனும் குற்றச்செயலுடன் தொடர்புடையதா என்பது குறித்து அதிகாரிகள் பல்வேறு கோணங்களில் விசாரணைகளை முன்னெடுத்து வருகின்றனர்.

மேலும், கோர்செகோவிற்கு மேல்பகுதியில் அமைந்துள்ள ட்ரெசானோ சுல் நாவிக்லியோ (Trezzano sul Naviglio) அல்லது அபியாடென்சே (Abbiategrasso) பகுதிகளில் அவர் கால்வாயில் தவறி விழுந்து பின்னர் நீரோட்டத்தால் அடித்துச் செல்லப்பட்டிருக்கலாம் என்ற சந்தேகமும் விசாரணையாளர்களால் முன்வைக்கப்பட்டுள்ளது.

நவிக்லியோ கிராண்டே கால்வாய் சுற்றுலாப் பயணிகள் மற்றும் பொதுமக்கள் அதிகம் பயன்படுத்தும் பகுதியாக இருந்தாலும், சில இடங்களில் பாதுகாப்பு வேலிகள் மிகவும் தாழ்வாக அமைந்துள்ளதால் விபத்து அபாயம் இருப்பதாக உள்ளூர் மக்கள் நீண்டகாலமாக சுட்டிக்காட்டி வருகின்றனர். இதனால், உயிரிழந்தவர் குளிர்ச்சியடையவோ அல்லது நீரில் இறங்க முயன்றபோதோ தவறி விழுந்திருக்கலாம் என்ற சாத்தியக்கூறுகளும் ஆராயப்பட்டு வருகின்றன.

இந்நிலையில், பிரேதப் பரிசோதனை மற்றும் மேலதிக தடயவியல் ஆய்வுகளின் முடிவுகள் வெளியாகிய பின்னரே மரணத்திற்கான உண்மையான காரணம் உறுதியாக தெரியவரும் என இத்தாலிய அதிகாரிகள் தெரிவித்துள்ளனர்.