வெளிநாட்டு மாணவர்களுக்கான கல்விக் கட்டண விலக்கு வரம்பு அதிகரிப்பு – பிரான்ஸ் அரசு புதிய அறிவிப்பு.

ஐரோப்பிய ஒன்றியத்திற்கு (European Union) வெளியே இருந்து வரும் வெளிநாட்டு மாணவர்களுக்கான கல்விக் கட்டண விலக்கு குறித்த தனது முந்தைய திட்டத்தைப் பிரான்ஸ் அரசு தற்போது மாற்றியமைத்துள்ளது. இதன்படி, ஒவ்வொரு பல்கலைக்கழகமும் இனி இருபது (20) சதவீத வெளிநாட்டு மாணவர்களுக்குக் கல்விக் கட்டண விலக்கு அளிக்க முடியும்.

பல்கலைக்கழகத் தலைவர்களின் கோரிக்கையை ஏற்று, பிரான்ஸ் உயர்கல்வி மற்றும் ஆராய்ச்சித்துறை அமைச்சர் பிலிப் பாப்டிஸ்ட் (Philippe Baptiste) இந்தப் புதிய அறிவிப்பை வெளியிட்டுள்ளார். ஆரம்பத்தில் பத்து (10) சதவீத மாணவர்களுக்கு மட்டுமே கட்டண விலக்கு அளிக்கப்படும் என அறிவிக்கப்பட்டிருந்த நிலையில், பல்கலைக்கழகங்களுக்குக் கூடுதல் தளர்வுகளை வழங்கும் விதமாக இந்த வரம்பு தற்போது இருபது (20) சதவீதமாக உயர்த்தப்பட்டுள்ளது.

“உயர்கல்விக்காகப் பிரான்சைத் தேர்ந்தெடுங்கள்” (Choose France) என்ற திட்டத்தின் கீழான இந்த முடிவு, நடைமுறைச் சிக்கல்களைக் குறைப்பதற்காகவே எடுக்கப்பட்டுள்ளது என அமைச்சகம் விளக்கமளித்துள்ளது. இதன்படி, பொருளாதார அடிப்படையில் பின்தங்கிய வெளிநாட்டு மாணவர்களுக்கு (அதாவது ஐந்தில் ஒருவருக்கு) இந்தக் கட்டண விலக்கு அளிக்கப்படும்.

இந்த இருபது (20) சதவீத இலக்கானது இரண்டாயிரத்து இருபத்தி எட்டாம் (2028) கல்வியாண்டிற்குள் படிப்படியாக எட்டப்படும். இதற்கிடையில், இந்த மாற்றத்தைச் சீராகச் செயல்படுத்துவதற்காக வரவிருக்கும் கல்வியாண்டில் முப்பது (30) சதவீதமாகவும், இரண்டாயிரத்து இருபத்தி ஏழாம் (2027) ஆண்டில் இருபத்தி ஐந்து (25) சதவீதமாகவும் கட்டண விலக்கு வழங்கப்படும் எனப் புதிய வரைவில் குறிப்பிடப்பட்டுள்ளது.

கட்டண விலக்கு பெறாத, போதிய வசதியுள்ள மற்ற வெளிநாட்டு மாணவர்களுக்கு இளங்கலைப் பட்டப்படிப்பிற்கு (Bachelor’s Degree) இரண்டாயிரத்து எண்ணூற்றுத் தொண்ணூற்று ஐந்து (2,895) யூரோக்களும் (Euros), முதுகலைப் பட்டப்படிப்பிற்கு (Master’s Degree) மூவாயிரத்துத் தொள்ளாயிரத்து நாற்பத்தி ஒன்று (3,941) யூரோக்களும் கட்டணமாக நிர்ணயிக்கப்பட்டுள்ளது.

“இந்தக் கட்டணம் என்பது ஒரு மாணவரின் மொத்தக் கல்விச் செலவில் வெறும் முப்பது (30) சதவீதம் மட்டுமே” என அமைச்சர் முன்னதாகத் தெளிவுபடுத்தியிருந்தார். இருப்பினும், பெரும்பான்மையான கல்வியாளர்கள் வெளிநாட்டு மாணவர்களிடம் அதிகக் கட்டணம் வசூலிக்கும் இந்தத் திட்டத்தைக் கடுமையாக எதிர்க்கின்றனர். பிரான்ஸின் மனிதநேயம் மற்றும் அனைவரையும் அரவணைக்கும் பண்புகளுக்கு இது எதிரானது என்றும், இதனால் ஏழை மாணவர்கள் பிரான்ஸ் நோக்கி வருவது தடைபடும் என்றும் அவர்கள் கவலை தெரிவித்துள்ளனர்.