கோடைக்கால விடுமுறைப் பயணங்களில் கடும் நெரிசலும் குழப்பமும் ஏற்படும் என்பதால், ஐரோப்பிய ஒன்றியத்தின் புதிய ‘நுழைவு-வெளியேற்ற அமைப்பான’ (EES – Entry/Exit System) பயோமெட்ரிக் எல்லைச் சோதனைகளைத் தற்காலிகமாக நிறுத்தி வைக்குமாறு விமான நிறுவனங்களும், விமான நிலையங்களும் விடுத்த கோரிக்கையை ஐரோப்பிய ஒன்றியம் திட்டவட்டமாக நிராகரித்துள்ளது. இந்தக் கட்டுப்பாடுகளை முழுமையாக இடைநிறுத்துவது தேவையற்றது மற்றும் சாத்தியமற்றது என ஐரோப்பிய ஒன்றிய அதிகாரிகள் தெரிவித்துள்ளனர்.

கடந்த 2025 அக்டோபர் முதல் நடைமுறைக்கு வந்த இந்த EES அமைப்பால், ஷெங்கன் (Schengen) எல்லைகளில் மூன்றாம் நாட்டுப் பயணிகளின் வருகை மற்றும் வெளியேற்றம் கைரேகை மற்றும் முகப் பதிவு மூலம் டிஜிட்டல் முறையில் கண்காணிக்கப்படுகிறது. இதனால் எல்லைகளில் 5 மணி நேரம் வரை பயணிகள் காத்திருக்கும் நிலை ஏற்படுவதாகவும், போர்ச்சுகல், ஸ்பெயின், இத்தாலி, கிரீஸ் போன்ற நாடுகளில் பயணிகள் இணைப்பு விமானங்களைத் தவறவிடுவதாகவும் சர்வதேச விமானப் போக்குவரத்து சங்கம் (IATA) மற்றும் ரயன்ஏர் (Ryanair) உள்ளிட்டவை குற்றம் சாட்டியுள்ளன. இது ஐரோப்பிய சுற்றுலாவையும், நற்பெயரையும் சீர்குலைக்கும் என அவர்கள் எச்சரித்துள்ளனர்.

எனினும், இடம்பெயர்வுத் தலைவர் மேக்னஸ் புரூனர் (Magnus Brunner) இதற்கு விளக்கமளிக்கையில், ஐரோப்பாவைப் பாதுகாப்பானதாக மாற்றும் இந்த அமைப்பில் உள்ள ஆரம்பக்காலச் சிக்கல்களைத் தீர்க்கத் தீவிர நடவடிக்கை எடுக்கப்பட்டு வருவதாக உறுதியளித்துள்ளார். மொத்தம் உள்ள 1,500 எல்லைக் கடக்கும் இடங்களில் வெறும் 20 இடங்களில் மட்டுமே தற்போது சிக்கல்கள் உள்ளதாக அதிகாரிகள் சுட்டிக்காட்டியுள்ளனர். மேலும், நெரிசல் கட்டுக்கடங்காமல் போனால் அமைப்பைத் தற்காலிகமாக நிறுத்தி வைக்கும் விலக்கு வரும் செப்டம்பர் மாதத்துடன் முடிவடையவுள்ளதும் குறிப்பிடத்தக்கது.