பிரான்சில் நடைபெறவுள்ள அதிபர் தேர்தலை முன்னிட்டு, தீவிர வலதுசாரிக் கட்சியான ‘ராசெம்பிள்மென்ட் நேஷனல்’ (Rassemblement National – RN) ஆட்சிக்கு வரக்கூடும் என்ற தனது அச்சத்தை உலகப் புகழ்பெற்ற கால்பந்து நட்சத்திரம் கிலியன் எம்பாப்பே (Kylian Mbappé) வெளிப்படுத்தியுள்ளார். ‘வேனிட்டி ஃபேர்’ (Vanity Fair) இதழுக்கு அவர் வழங்கிய பிரத்தியேக நேர்காணலில், “அவர்கள் போன்றவர்கள் ஆட்சிக்கு வந்தால் என் நாட்டுக்கு என்ன மாதிரியான விளைவுகள் ஏற்படும் என்பதை நான் நன்கு அறிவேன்; நாங்களும் இந்த நாட்டின் குடிமக்கள்தான், எனவே எங்களுடைய குரலையும் அரசியல் கருத்துகளையும் வெளிப்படுத்த எங்களுக்கு முழு உரிமை உண்டு” என்று ஆணித்தரமாகத் தெரிவித்துள்ளார்.

எம்பாப்பேவின் இந்த அதிரடி அரசியல் கருத்து பிரெஞ்சு அரசியல் வட்டாரத்தில் பெரும் விவாதத்தைக் கிளப்பியுள்ளது. இதற்குப் பதிலடி கொடுக்கும் வகையில் ஆர்.என் (RN) கட்சியின் தலைவரான ஜோர்டான் பார்டெல்லா (Jordan Bardella) நகைச்சுவை கலந்த விமர்சனம் ஒன்றை முன்வைத்துள்ளார். அவர் குறிப்பிடுகையில், “கிலியன் எம்பாப்பே பி.எஸ்.ஜி (PSG) அணியை விட்டுச் சென்ற பிறகுதான் அந்த அணி சாம்பியன்ஸ் லீக் (Champions League) கோப்பையை வென்றது; இன்னும் ஒருமுறையும் அவர்களால் வெல்ல முடியும்” என்று எம்பாப்பேவின் விளையாட்டு வாழ்க்கையைச் சுட்டிக்காட்டி மறைமுகமாகத் சாடியுள்ளார்.

இதற்கிடையில், பாரிஸ் (Paris) நகர மேயர் இமானுவேல் கிரெகொயர் (Emmanuel Grégoire) கால்பந்து வீரர் எம்பாப்பேவுக்குத் தனது முழுமையான ஆதரவைத் தெரிவித்துள்ளார். இது குறித்துத் தனது எக்ஸ் (X) தளப் பதிவில், “விளையாட்டு வீரர்கள், கலைஞர்கள் மற்றும் பொதுப் பிரபலங்கள் தங்களின் அரசியல் கருத்துகளை வெளிப்படுத்துவதற்கு முழு உரிமையும் நியாயமும் கொண்டவர்கள்; தீவிர வலதுசாரி அரசியலுக்கு எதிராகத் தெளிவாகக் குரல் கொடுத்துள்ள கிலியன் எம்பாப்பேவுக்கு என் ஆதரவு என்றும் இருக்கும்” என்று பதிவிட்டுள்ளார். மேலும், பாரிஸ் மேயராகப் பொறுப்பேற்ற பிறகு, ‘பாக் டெ பிரின்ஸ்’ (Parc des Princes) மைதான விவகாரத்தில் பாரிஸ் செயின்ட்-ஜெர்மைன் (PSG) அணியுடன் அவர் மீண்டும் பேச்சுவார்த்தையைத் தொடங்கியுள்ளதாகவும் தகவல்கள் வெளியாகியுள்ளன.