பிரான்சில் (France) காணொளி வழியான மருத்துவ ஆலோசனைகள் (Teleconsultations) மூலம் போலியாக மருத்துவ விடுப்பு (Arrêt maladie) பெறுவதைத் தடுக்கும் நோக்கில் அரசு புதிய கடுமையான கட்டுப்பாடுகளைக் கொண்டுவந்துள்ளது. இதன் மூலம், வீட்டில் இருந்தபடியே நீண்ட நாட்களுக்கு எளிதாக மருத்துவ விடுப்பு வாங்கும் முறைக்கு முற்றுப்புள்ளி வைக்கப்பட்டுள்ளது. கடந்த ஜூன் 25-ஆம் தேதி இயற்றப்பட்டுள்ள புதிய ‘மோசடித் தடுப்புச் சட்டத்தின்’ (Anti-fraud law) படி, இனி காணொளி மருத்துவ ஆலோசனை மூலம் அதிகபட்சமாக மூன்று (3) நாட்களுக்கு மட்டுமே மருத்துவ விடுப்புச் சான்றிதழ் பெற முடியும். மூன்று நாட்களுக்கு மேல் விடுப்பு தேவையென்றால், நோயாளிகள் கட்டாயம் மருத்துவரை நேரில் சென்று சந்திக்க வேண்டும் என அரசு திட்டவட்டமாக அறிவித்துள்ளது.

எனினும், உங்களின் அதிகாரப்பூர்வ குடும்ப மருத்துவர் (Médecin traitant) அல்லது மகப்பேறு மருத்துவச்சி காணொளி மூலம் பரிசோதித்தாலோ, அல்லது உடல்நலக்குறைவால் நேரில் மருத்துவமனைக்குச் செல்ல முடியாத நிலையில் உள்ள நோயாளிகளுக்கோ இந்தத் தடையிலிருந்து விலக்கு அளிக்கப்பட்டுள்ளது. மேலும், வரும் செப்டம்பர் 1-ஆம் தேதி முதல், ஒருவருக்கு முதல்முறையாக வழங்கப்படும் மருத்துவ விடுப்புத் தொடர்ந்து 31 நாட்களைத் தாண்டக் கூடாது எனவும், அந்த விடுப்பை நீட்டிக்கும் காலவரம்பு அதிகபட்சம் 62 நாட்களாகக் குறைக்கப்பட்டுள்ளதாகவும் புதிய சமூகப் பாதுகாப்பு நிதி மசோதாவில் (PLFSS) தெரிவிக்கப்பட்டுள்ளது.

இந்தப் புதிய கட்டுப்பாடுகள் வந்தாலும், சான்றிதழைச் சமர்ப்பிக்கும் நடைமுறையில் எந்த மாற்றமும் இல்லை; பணியாளர்கள் தங்களின் மருத்துவ விடுப்புச் சான்றிதழை 48 மணி நேரத்திற்குள் தங்களின் நிறுவனத்திற்கும், மருத்துவக் காப்பீட்டு ஆணையத்திற்கும் அனுப்பிவிட வேண்டும். விடுப்பு குறித்துச் சந்தேகம் எழுந்தால், நிறுவனம் நேரடியாக நோயாளியின் வீட்டிற்குச் சென்றோ அல்லது வேறொரு மருத்துவர் மூலமாகவோ மறுபரிசோதனை (Contre-visite) செய்ய முழு உரிமை உண்டு. எல்லாவற்றிற்கும் மேலாக, போலியான மருத்துவ விடுப்புச் சான்றிதழைச் சமர்ப்பிப்பது நிரூபிக்கப்பட்டால், வேலை பறிபோவதுடன், 5 ஆண்டுகள் சிறைத்தண்டனையும், எழுபத்தையாயிரம் யூரோக்கள் (€75,000) வரை அபராதமும் விதிக்கப்படும் எனப் பிரெஞ்சு அரசு மிகக் கடுமையாக எச்சரித்துள்ளது.