டொரொண்டோவின் பிக்கரிங் எல்லைப் பகுதியில் மர்மமான முறையில் உயிரிழந்த ஒருவரின் சடலம் கண்டெடுக்கப்பட்டுள்ளது.
ஹைவே 401 மற்றும் வைட்ஸ் ரோடு சந்திப்பு அருகே நள்ளிரவு 12:06 மணியளவில் அவசர அழைப்பு ஒன்று பதிவாகியதை அடுத்து, டொரொண்டோ காவல்துறையினர் சம்பவ இடத்திற்கு விரைந்தனர்.
அங்கு அடையாளம் தெரியாத ஒருவரின் உடல் கண்டெடுக்கப்பட்டது. இந்த மரணத்தில் சந்தேகத்திற்கிடமான சூழ்நிலைகள் இருப்பதால், இது கொலை வழக்காக விசாரிக்கப்படுவதாக காவல்துறை உறுதிப்படுத்தியுள்ளது.
தற்போது வரை உயிரிழந்தவரின் அடையாளம் அல்லது மரணத்திற்கான காரணம் குறித்த விவரங்கள் வெளியிடப்படவில்லை. இந்த விசாரணையை டொரொண்டோ காவல்துறையின் கொலைப் பிரிவு மேற்கொண்டு வருகிறது.
மேலும், இது டர்ஹாம் பிராந்திய காவல்துறையின் எல்லைக்கு உட்பட்ட பகுதியாக இருந்தாலும், டொரொண்டோ காவல்துறையே இந்த விசாரணையை முன்னெடுப்பது குறித்து எந்த விளக்கமும் இதுவரை வழங்கப்படவில்லை.
சம்பவ இடத்தில் காவல்துறையினர் பகுதியை மூடி, தடயங்களை சேகரித்து வருகின்றனர். இந்த சம்பவம் குறித்து தகவல் அறிந்தவர்கள் டொரொண்டோ காவல்துறையை 416-808-2222 என்ற எண்ணில் தொடர்பு கொள்ளுமாறு கேட்டுக் கொள்ளப்பட்டுள்ளனர். மேலதிக விவரங்கள் விரைவில் வெளியிடப்படும் என காவல்துறை தெரிவித்துள்ளது.
